按：琪官、瑤官兩人離了拜月房櫳，趁著月色，且說且走。
瑤官道：「今朝夜頭個亮月，比仔前日夜頭再要亮。前日夜頭末鬧熱仔一夜天，今朝夜頭一個人也無撥。」琪官道：「俚哚阿算啥賞月嗄，像倪故歇，故末倒真真是賞個月。」瑤官道：「倪索性到蜿蜒嶺浪去，坐來哚天心亭里，一個花園通通才看見。該首賞月末最好哉。」琪官道：「正經要賞月，耐阿曉得哈場花？來里志正堂前頭高台浪，有幾花機器，就是個看亮月同看星個家生。有仔家生，連搭仔太陽才好看哉，看仔末，再有幾花講究。俚哚說同皇帝屋裡觀象台一個樣式，就不過小點。」
瑤官道：「價末倪到高台浪去罷。倪也用勿著俚家生，就實概看看末哉。」琪官道：「倘忙碰著個客人，勿局個。」瑤官道：「客人才匆來浪呀。」琪官道：「倪還是大觀樓去張張孫素蘭阿曾困，故末蠻好。」瑤官高興，連說：「去喤。」
兩人竟不轉彎歸院，一直踅上九曲平橋，遙望大觀樓琉璃碧瓦映著月亮，也亮晶晶的射出萬道寒光，籠著些迷濛煙霧。
兩人到了樓下，寂靜無聲，上下窗寮一律掩閉，裡面黑魆魆地，椎西南角一帶樓窗系素蘭房間，好像有些微燈火在兩重紗饅之中。兩人四顧徘徊，無從進步。
琪官道：「常恐困哉喤。」瑤官道：「倪喊聲俚看。」琪官無語，瑤官就高叫一聲：「素蘭先生。」樓上不見接應，卻見紗幔上忽然現個人影兒，似是側耳竊聽光景。瑤官再叫一聲，那人方卷幔推窗，望下問道：「啥人來里喊？」琪官聽聲音正是孫素蘭，搭嘴道：「倪來張耐呀，阿要困哉？」素蘭辨識分明，大喜道：「快點上來喤，倪勿困喤。」瑤官道：「勿困末，門才關哉唍。」素蘭道：「倪來開，耐等一歇。」琪官道：「要勿開哉，倪也轉去困哉。」素蘭慌的招手跺腳。道：「要勿去呀，來開哉呀！」瑤官見其發急，慫恿琪官略俟一刻。那素蘭的跟局大姐一層層開下門來，手持洋燭手照，照請兩人上樓。
素蘭迎見，即道：「我要商量句閑話，耐兩家頭困來里要勿轉去，阿好？」琪官駭異問故，素蘭道：「耐想該搭大觀樓，前頭後底幾花房子，就剩我搭個大姐來里，陰氣煞個，怕得來，困也生來困勿著。正要想到耐搭梨花院落來末，倒剛剛耐兩家頭來喊哉。謝謝耐，陪我一夜天，明朝就匆要緊哉。」瑤官不敢作主，轉問琪官如何。琪官尋思半日，答道：「倪兩家頭團來里，本底子也勿要緊。故歇比勿得先起頭，有點間架哉。要末還是耐到倪搭去噥噥罷，不過怠慢點。」素蘭道：「耐搭去最好哉，耐末再要客氣。」
當下大姐吹滅油燈，掌著燈台，照送三人下樓，將一層層門反手帶上，扣好鈕喤。琪官、瑤官不複流連風景，引領素蘭、大姐徑望梨花院落歸來。只見院牆門關得緊緊的，敲夠多時，有個老婆子從睡夢中爬起，七跌八撞開了門。瑤官急問：「阿有開水？」老婆子道：「陸里再有開水！啥辰光哉嗄，茶爐子隱仔長遠哉。」琪官道：「關好仔門去困，要勿多說多話。」
老婆子始住嘴。
四人從暗中摸索，並至樓上琪官房間。瑤官劃根自來火，點著大姐手中帶來燭台，請素蘭坐下。琪官欲搬移自己鋪蓋，讓出大床給素蘭睡。素蘭不許搬，欲與琪官同床，琪官只得依了。瑤官招呼大姐，安頓於外間榻床之上。琪官復尋出一副紫銅五更雞，親手舀水燒茶。琪官也取出各色廣東點心裝上一大盤，都將來請素蘭。素蘭深抱不安。
三人於燈下圍坐，促膝談心，甚是相得。一時問起家中有無親人，可巧三人皆系沒爺娘的，更覺得同病相憐。琪官道：「小個辰光無撥仔爺娘，故末真真是苦惱子！阿哥、阿嫂陸里靠得住？場面蠻要好，心裡來哚轉念頭。小干仵勿懂啥事體，上仔俚哚當還勿曾覺著。倘然有個把爺娘來浪，我為啥到該搭來！」素蘭道：「一點勿差。我爺娘剛剛死仔三個月，阿伯就出我個花樣，一百塊洋錢賣撥人家做丫頭。幸虧我曉得仔，告訴仔娘舅，拿買棺材個洋錢還撥仔阿伯，難末出來做生意。陸里曉得個娘舅也是個壞坯子，我生意好仔點，騙我五百塊洋錢去，人也匆來哉！」
瑤官在旁默然果聽，眼波瑩瑩然要吊下淚來。素蘭顧問道：「耐來仔該搭幾年哉？」琪官代答道：「俚乃再要討氣！來個辰光俚個爺一淘同得來，俚自家也叫俚『爺』。後來我問問俚，啥個爺嗄，是俚慢娘個姘頭！」
素蘭道：「耐兩家頭運道倒無啥，才到仔該搭來也罷哉。
我個命末生來是苦命，才說我無撥幫手個勿好，碰著仔要緊事體，獨是我一於子發極，再有啥人替我商量商量？有仔點勿快活，悶來浪肚皮里，也無處去說唍。要尋個對景點娘姨、大姐，才難煞哚。」琪官道：「耐也總算稱心個哉，比仔倪好多花哚。
像倪就說是兩家頭，阿有啥用場嗄？自家先一點點做匆來主，再要幫別人，生來勿成功。停兩年，也說勿定倪兩家頭來浪一堆匆來浪一堆。」
素蘭道：「說到後底事體，大家看勿見，怎曉得有結果無結果？我想無撥啥法子，過一日末是一日，碰去看光景。」瑤官插說道：「倪末來里過一日是一日。耐個後底事體，有點數目來浪。華老爺搭耐好得非凡，嫁得去末，端正享福好哉，阿有啥看勿見？」素蘭失笑道：「耐倒說得寫意哚。要是實概說起來，齊大人也蠻好唍，耐兩家頭為啥勿嫁撥仔齊大人嗄？」
瑤官道：「耐末說說正經就說到仔歪里去！」琪官點頭道：「閑話倒也是正經閑話，總歸做仔個女人，大家才有點說匆出個為難場花，外頭人陸里曉得？單有自家心裡明白。想來耐華老爺好末好，終勿能夠十二分稱心阿對？」
素蘭抵掌道：「耐個閑話故末蠻准，可惜我匆是長住來里，住來里仔同耐講講閑話，倒無啥。」瑤官道：「故也陸里說得定？倪出去也匆曉得，耐進來也匆曉得，耐說個『碰去看光景』。」琪官道：「我說大家閑話對景仔，倒勿是定歸要來浪一堆；就匆來浪一堆，心裡也好像快活點。」素蘭聞言，欣然倡議道：「倪三個人索性拜姊妹阿好？」瑤官搶說：「蠻好，拜仔末大家有照應。」
琪官正待說話，只聽得外面「歷歷碌碌」，不知是何聲響。
琪官膽小，取只手照拉同瑤官出外照看。那月早移過廂樓屋脊，明星漸稀，荒雞四叫，院中並無一些動靜。兩人各處兜轉來，卻驚醒了榻床上大姐，迷糊著兩眼，問是「做啥」。兩人說了，大姐道：「下頭來浪響呀。」說著，果然「歷歷碌碌」響聲又作，乃班裡女孩兒睡在樓下，起來便遺。兩人呼問明白，放心回房，隨手掩上房門，向素蘭道：「天要亮哉，倪困罷。」素蘭應諾。瑤官再請素蘭用些茶點，收拾乾淨，自去間壁自己房間睡下。琪官爬上大床，並排鋪了兩條薄被，請素蘭寬衣，分頭各睡。
素蘭錯過睡性，翻來覆去睡不著；聽琪官寂然不動，倒是間壁瑤官微微有些鼻聲。俄而一隻烏鴉「啞啞」叫著，掠過樓頂。素蘭揭帳微窺，四扇玻璃窗倏變作魚肚白色，輕輕叫琪官不答應，索性披衣起身，盤坐床中。不想琪官並未睡著，僅合上眼養養神，初時不應，聽素蘭起坐，也就撐起身來，對坐攀話。
素蘭道：「耐說倪拜姊妹阿好？」琪官道：「我說勿拜一樣好照應，拜個啥嗄？要拜末今朝就拜。」素蘭道：「好個，今朝就拜。那價個拜法喤？」琪官道：「倪拜姊妹，不過拜個心。擺酒送禮多花空場面，才用勿著，就買仔副香燭，等到夜頭，倪三個人清清爽爽，磕幾個頭末好哉唍。」素蘭道：「蠻好，我也說寫意點好。」
琪官見天已大明，略挽一挽頭髮，跨下床沿，趿雙拖鞋，往床背後去。一會兒，出來凈過手，吹滅梳妝台上油燈，復登床擁被而坐，乃從容問素蘭道：「倪拜仔姊妹，賽過一家人，隨便啥閑話才好說個哉。我要問耐，倪看個華老爺無啥唍，為仔啥勿稱心嗄？」素蘭未言先嘆道：「要勿說起，說起仔末真真討氣！俚乃個人倒勿是有啥個勿稱心，我同俚樣色樣蠻對景，就為仔一樣勿好。俚乃個人做一百樁事體末，定歸有九十九樁勿成功哚。有點干己個事體，俚乃生來勿肯做。就教俚做樁小事體，俚乃要四面八方通通想到家，是匆要緊個，難末再做；倘然有個把閑人說仔一聲勿好，就匆做個哉。耐想實概個脾氣，阿能夠討我轉去？俚自家要討也匆成功。」琪官道：「倪一徑來里說，先生小姐要嫁人，容易得勢，陸里一個好末就嫁撥仔陸里一個，自家去揀末哉。故歇聽耐說華老爺，例劃一為難。」
素蘭轉而問道：「我也要問耐，耐兩家頭自家算計，阿嫁人勿嫁人？」琪官亦未言先嘆道：「倪末再要為難也無撥！
故歇無啥人來里，搭耐說說勿要緊。倪從小到個該搭，生來才要依個大人，依仔哉唍，故末真間架。大人六十多歲年紀哉，倘忙出仔事體下來，像倪上勿上下勿下，算啥等樣人嗄？難要想著仔嫁人末，晚哉！」素蘭道：「坎坎瑤官來浪說，出去也說勿定，阿是實概個意思？」琪官道：「俚乃肚皮里還算明白，就不過有點