接：來安暨沈小紅兄弟在客堂里等了多時，娘姨阿珠出來，卻和沈小紅兄弟先回。來安又等一會，洪善卿才出來，向來安道：「俚哚教我勸勸王老爺。倪是朋友，倒有點間架頭。要末同仔王老爺到俚搭去，讓俚哚自家說，耐說阿對？」
來安那有不對之理，滿口答應。善卿即帶來安同行，仍坐東洋車，逞往四馬路東合興里張蕙貞家。
其時王蓮生正叫了四隻小碗，獨酌解悶。善卿進見，蓮生讓坐。善卿笑道：「昨日夜頭辛苦哉？」蓮生含笑嗔道：「耐再要調皮，起先我教耐打聽，耐勿肯。」善卿道：「打聽啥嗄？」
蓮生道：「倌人姘仔戲子，阿是無處打聽哉。」善卿道：「耐自家勿好，同俚去坐馬車，才是馬車浪坐出來個事體。我阿曾搭耐說：沈小紅就為仔坐馬車，用場大點？耐勿覺著唍！「蓮生連連搖手道：「要勿說哉，倪吃酒。」
娘姨添上一副杯筷，張蕙貞親來斟酒。蓮生乃和善卿說：「翡翠頭面要勿買哉。」另有一篇帳目，開著天青披、大紅裙之類，托善卿趕緊買辦。善卿笑向蕙貞道：「恭喜耐。」蕙貞羞得遠遠走開。
善卿正色說蓮生道：「故歇耐討蕙貞先生是蠻好。不過沈小紅搭耐就實概勿去仔，終好像勿局喤。」蓮生焦躁道：「耐管俚局勿局！」善卿訕笑婉言道：「勿是呀，沈小紅單做耐一個客人，耐勿去仔無投哉！剛剛碰著仔節浪，幾花開消才匆著杠；屋裡再有爺娘搭兄弟，一家門要吃要用，教俚再有啥法子？
四面逼上去，阿是要逼殺俚性命哉？雖然沈小紅性命也無啥要緊，九九歸原，終究是為仔耐，也算一樁罪過事體。倪為仔白相了，倒去做罪過事體末。何苦呢？」蓮生沉吟點頭道：「耐是也來浪幫俚哚？」善卿艴然作色道：「耐倒說得稀奇，我為啥去幫俚哚？」蓮生道：「耐要我到俚搭去，阿是幫俚哚嗄？」
善卿「咳」的長嘆一聲，卻轉而笑道：「耐做仔沈小紅末，我一徑說無啥趣勢，耐勿相信，搭俚恩煞。故歇耐動仔氣，倒說我幫俚哚哉，故末真真無啥話頭！」蓮生道：「價末耐為啥要我去？」善卿道：「我匆是要耐再去做俚，耐就去一埭好哉。」蓮生道：「去一埭末做啥嗄？」善卿道：「故末就是替耐算計，常恐有啥事體。耐去仔，俚哚要一放心哚，耐末也好看看俚哚光景。四五年做下來，總有萬把洋錢哉，一點點局帳也犯勿著少俚，耐去撥仔俚，讓俚去開消仔，節浪也好過去。
難下節做勿做，隨耐個便，阿是嗄？」
蓮生聽罷無言。善卿因慫恿道：「晚歇我同耐一淘去，看俚說啥；倘然有半句閑語聽勿進末，倪就走。」蓮生直跳起來，嚷道：「我勿去！」善卿只得訕笑剪住。
兩人各飲數杯，仍和蕙貞一同吃過中飯。善卿要去代蓮生買辦，蓮生也要暫回公館，約善卿日落時候原於此處相會。善卿應諾先行。
蓮生吸不多幾口鴉片煙，就喊打轎，逕歸五馬路公館，坐在樓上卧房中，寫兩封應酬信札。來安在傍伏侍。忽聽得吉了當銅鈴搖響，似乎有人進門，與蓮生的侄兒天井裡說話；隨後一乘轎子，抬至門首停下。蓮生只道是拜客的，令來安看來。
來安一去，竟不覆命，卻有一陣「咭咭咯咯」小腳聲音踅上樓梯。
蓮生自往外間看時，誰知即是沈小紅，背後跟著阿珠。蓮生一見，暴跳如雷，厲聲喝道：「耐再有面孔來見我，搭我滾出去！」喝著，還不住的跺腳。沈小紅水汪汪含著兩眶眼淚，不則一聲。阿珠上前分說，也按捺不下。蓮生一頓胡鬧，不知說些甚麼。
阿珠索性坐定，且等蓮生火性稍殺，方朗朗說道：「王老爺，比方耐做仔官，倪來告狀，耐也要聽明白仔，難末該應打、該應罰，耐好斷唍。故歇一句閑話也匆許倪說，耐陸里曉得有冤枉個事體？」蓮生盛氣問道：「我冤枉仔俚啥？」阿珠道：「耐是匆曾冤枉倪。倪先生有點冤枉，要搭耐說，耐阿要俚說嗄？」蓮生道：「俚再要說冤枉末，索性去嫁撥仔戲子好哉唍！」阿珠倒呵呵冷笑道：「俚兄弟冤枉仔俚，好去搭俚爺娘說；俚爺娘冤枉仔俚，再好搭耐王老爺說；耐王老爺再要冤枉俚，真真教俚無處去說哉！」說了，轉向小紅道：「倪去罷，再說啥嗄？」
那小紅亦坐在高椅上，將手帕掩著臉嗚嗚飲泣。蓮生亂過一陣，跑進卧房，概置不睬。小紅與阿珠在外間，寂靜無聲。
蓮生提起筆來，仍要寫信，久之不能成一字，但聞外間切切說話。接著小紅竟踅到卧房中，隔著書桌，對面而坐。蓮生低下頭只顧寫，小紅顫聲說道：「耐說我啥個啥個，我倒無啥；我為仔自家差仔點，對勿住耐，隨便耐去辦我，我蠻情願。為啥勿許我說閑話，阿是定歸要我冤枉死個？」說到這裡，一口氣奔上喉嚨，哽咽要哭。
蓮生擱下筆，聽他說甚。小紅又道：「我是吃煞仔倪親生娘個虧！先起頭末要我做生意，故歇來仔個從前做過歇個客人，定歸原要我做。我為仔娘了聽仔俚，說匆出個冤枉，耐倒再要冤枉我姘戲子。」
蓮生正待回駁，來安匆匆跑上，報說：「洪老爺來。」蓮生起身向小紅道：「我搭耐無啥閑話，我有事體來里，耐請罷。」
說畢，丟下沈小紅在房裡、阿珠在外間，逞下樓和洪善卿同行，至東合興里張蕙貞家。
張蕙貞將善卿辦的物事與蓮生過目。蓮生將沈小紅陪罪情形，述與蕙貞。大家又笑又嘆。當晚善卿吃了晚飯始去。
蕙貞臨睡，笑問蓮生道：「耐阿要再去做沈小紅？」蓮生道：「難是讓小柳兒去做個哉。」蕙貞道：「耐勿做末，倒要勿去糟塌俚。俚教耐去，耐就去去也無啥，只要如此如此。」
蓮生道：「起先我看沈小紅好像蠻對景，故歇勿曉得為啥，俚凶末勿凶哉，我倒也看勿起俚。」蕙貞道：「想必是緣分滿哉。」
閑論一回，不覺睡去。
次日五月初三，洪善卿於午後來訪蓮生，計議諸事，大略齊備，閑話中復說起沈小紅來。善卿仍前相勸，蓮生先人蕙貞之言，欣然願往。
於是洪善卿、王蓮生約同過訪沈小紅。張蕙貞送出房門，望蓮生丟個眼色，蓮生笑而領會。及至西薈芳里沈小紅家門首，阿珠迎著，喜出望外，呵呵笑道：「倪只道仔王老爺倪搭勿來個哉。倪先生勿曾急煞，還好俚。」一路訕笑，擁至樓上房間。
沈小紅起身廝見，叫聲「洪老爺」、「王老爺」，嘿然退坐。蓮生見小紅只穿一件月白竹布衫，不施脂粉，素凈異常；又見房中陳設一空，殊形冷落，只剩一面著衣鏡，為敲碎一角，還嵌在壁上，不覺動了今昔之感，浩然長嘆。阿珠一面加茶碗，一面搭訕道：「王老爺說倪先生啥個啥個，倪下頭問我：『陸里來個閑話？』我說：『王老爺肚皮里蠻明白來浪，故歇為仔氣頭浪說說罷哉呀，阿是真真說俚姘戲子？』」蓮生道：「姘勿姘，啥要緊嗄？要勿說哉。」阿珠事畢自去。
善卿欲想些閑話來說，笑問小紅道：「王老爺勿來末，耐牽記煞；來仔倒勿響哉。」小紅勉強一笑，向榻床取簽子燒鴉片煙，裝好一口在槍上，放在上手。蓮生就躺下去吸，小紅因道：「該副煙盤還是我十四歲辰光搭倪娘裝個煙，一徑放來浪勿曾用，故歇倒用著哉。」
善卿就問長問短，隨意講說。阿珠不等天晚，即請點菜便飯。蓮生尚未答應，善卿竟作主張，開了四色去叫。蓮生一味隨和。晚飯之後，阿珠早將來安、轎班打發回去，留下蓮生，那裡肯放。善卿辭別獨歸，只剩蓮生、小紅兩人在房。小紅才向蓮生說道：「我認得仔耐四五年，一徑勿曾看見耐實概個動氣。故歇來里我面浪動個氣，倒也為是搭我要好了，耐氣到實概樣式。我聽仔娘個閑話，勿曾搭耐商量，故末是我勿好。耐要冤枉我姘戲子，我就冤枉死仔，口眼也匆閉個喤！時髦倌人生意好，尋開心，要去姘戲子；像我生意阿好嗄？我咿勿是小干仵勿懂事體，姘仔戲子阿好做生意？外頭人為仔耐搭我要好末，才來浪眼熱；要勿說啥張蕙貞，連搭仔朋友也說我邱話。
故歇耐去說仔我姘戲子，再有啥人來搭我伸冤？除非到仔閻羅王殿浪剛剛明白哚。」
蓮生微笑道：「耐說勿姘就勿姘，啥要緊嗄。」小紅又道：「我身體末是爺娘養來浪。除仔身體，一塊布，一根線，才是耐辦撥我個物事。耐就打完仔，也無啥要緊。不過，耐要豁脫我個人，耐替我想想看，再要活來浪做啥？除仔死，無撥一條路好走。我死也匆怪耐，才是我娘勿好。不過我替耐想：耐來里上海當差使，家眷末也勿曾帶；公館裡就是一個二爺，笨手笨腳，樣色樣勿周到；外頭朋友，就算耐知己末，總有勿明白個場花，就是我一個人曉得耐脾氣。耐心裡要有啥事體，我也猜得著，總稱耐個心。就是說說笑笑，大家總蠻對景。張蕙貞巴結末巴結煞，阿能夠像我？我是單做耐一個，耐就匆曾討我轉去，賽過是耐個人，才靠耐來里過去。耐心裡除仔我，也無撥第二個稱心個人來浪。故歇耐為一時之氣，豁脫仔我，我是就不過死末哉，倒是替耐勿放心。耐今年也四十多歲哉，倪子、