按：黎篆鴻畢竟在那裡吃酒？原來便是羅子富的老相好蔣月琴家。李鶴汀先已知道，帶著匡二徑往東公和里來。匡二搶上前去通報。大姐阿虎接著，打起帘子請進房裡。李鶴汀看時，只有四老爺和一個幫閉門客姓於號老德的在座。四老爺乃是李鶴汀的嫡堂叔父二名叫李實夫。三人廝見，獨有主人黎篆鴻未到。李鶴汀正要動問，於老德先訴說道：「篆鴻來哚總辦公館裡應酬，月琴也叫仔去哉。俚說教倪三家頭先吃起來。」
當下叫阿虎喊下去，擺檯面，起手巾。適值蔣月琴出局回來，手中拿著四張局票，說道：「黎大人來哚來哉，教耐哚多叫兩個局，俚四個局末也搭俚去叫。」於老德乃去開局票，知道黎篆鴻高興，竟自首倡也叫了四個局。李鶴汀只得也叫四個，李實夫不肯助興，只叫兩個。發下局票，然後入席。
不多時，黎篆鴻到了，又拉了朱藹人同來，相讓就坐。黎篆鴻叫取局票來，請朱藹人叫局。朱藹人叫了林素芬、林翠芬姊妹兩個。黎篆鴻說太少，定要叫足四個方罷。又問於老德：「耐哚三家頭叫仔幾花局嗄？」於老德從實說了。黎篆鴻向李實夫一看，道：「耐啥也叫兩個局哚。難為耐哉唍，要六塊洋錢哚喤，荒荒唐唐！」李實夫不好意思，也訕笑道：「我無處去叫哉唍。」黎篆鴻道：「耐也算是老白相唍，故歇叫個局就無撥哉。說出閑話來阿要無志氣！」李實夫道：「從前相好年紀忒大哉，叫得來做啥？」黎篆鴻道：「耐阿曉得？勿會白相末白相小，會白相倒要白相老；越是老末越是有白相。』牢鶴汀聽說，即道：「我倒想著一個來里哉。」
黎篆鴻遂叫送過筆硯去，請李鶴汀替李實夫寫局票。李實夫留心去看，見李鶴汀寫的是屠明珠，躊躇道：「俚光景勿見得出局哉喤。」李鶴汀道：「倪去叫，俚阿好意思匆來？」黎篆鴻拿局票來看，見李實夫仍只叫得三個局，乃皺眉道：「我看耐要幾花洋錢來放來保箱子里做啥，阿是我面浪來做人家哉？」
又慫恿李鶴汀道：「耐再叫一個，也坍坍俚台，看俚阿有啥面孔！」李實夫只是訕笑。李鶴汀道：「叫啥人喤？」想了一想，勉強添上個孫素蘭。黎篆鴻自己復想起兩個局來，也叫於老德添上，一併發下。
這一席原是雙台，把兩隻方桌拼著擺的。賓主止有五位，座間寬綽得很，因此黎篆鴻叫倌人都靠檯面與客人並坐。及至後來坐不下了，方排列在背後。總共廿二個倌人，連廿二個娘姨、大姐，密密層層擠了一屋子。於老德挨次數去，惟屠明珠未到。蔣月琴問：「阿要去催？」李實夫忙說：「要勿催，俚就匆來也無啥。」
李鶴汀回頭見孫素蘭坐在身傍，因說道：「借光，耐綳綳場面。」孫素蘭微笑道：「要勿客氣，耐也是照應倪唍。」楊媛媛和孫素蘭也問答兩句，李鶴汀更自喜歡。林素芬與妹子林翠芬和起琵琶商量合唱。朱藹人揣度黎篆鴻意思，那裡有工夫聽曲子？暗暗搖手止住。
黎篆鴻自己叫的局倒不理會，卻看看這個，說說那個。及至屠明珠姍姍而來，黎篆鴻是認得的，又搭訕著問長問短，一時和屠明珠說起前十年長篇大套的老話來。李實夫湊趣說道：「讓俚轉局過來阿好？」黎篆鴻道：「轉啥局嗄？耐叫來哚末一樣好說說閑話個唍。」李實夫道：「價末坐該搭來，說說閑話也近便點。」黎篆鴻再要攔阻，屠明珠早立起身來，挪過坐位，緊靠在黎篆鴻肩下坐了。屠明珠的娘姨鮑二姐見機，隨給黎篆鴻裝水煙。黎篆鴻吸過一口，倒覺得不好意思的，便做意道：「耐要勿來瞎巴結裝水煙，晚歇口老太爺動仔氣，吃起醋來，我老老頭打匆過俚唍！」屠明珠格聲笑道：「黎大人放心。四老太爺要打耐末，我來幫耐末哉。」黎篆鴻也笑道：「耐倒看中仔我三塊洋錢哉，阿是？」屠明珠道：「阿是耐勿捨得三塊洋錢，連水煙才要勿吃哉？鮑二姐，拿得來，要勿撥俚吃！要勿難為仔俚三塊洋錢，害俚一夜困勿著。」
那鮑二姐正裝好一簡水煙給黎篆鴻吸，竟被屠明珠伸手接去，卻忍不住掩口而笑。黎篆鴻道：「耐哚來里欺瞞我老老頭，阿伯罪過嗄？要天打個喤！」屠明珠那簡煙正吸在嘴裡，幾乎嗆出來，連忙噴了，笑道：「耐哚看黎大人喤，要哭出來哉！
哪，就撥耐吃仔筒罷。」隨把水煙筒嘴湊到黎篆鴻嘴邊。黎篆鴻伸頸張口，一氣吸盡，喝聲采道：「阿啃！鮮得來！」鮑二姐也失笑道：「黎大人倒有白相哚。」於老德向屠明珠道：「耐也上仔黎大人當水哉！水煙末吃仔，三塊洋錢勿著杠喤。」
黎篆鴻拍手嘆道：「撥來耐哚說穿仔末，倒勿好意思再吃一筒哉唍！」說的合席笑聲不絕。
蔣月琴掩在一傍，插不上去；見朱藹人抽身出席，向榻床躺下吸鴉片煙。蔣月琴趁空，因過去低聲問朱藹人道：「阿看見羅老爺？」朱藹人道：「我有三四日勿看見哉。」蔣月琴道：「羅老爺倪搭開消仔，匆來哉呀。耐哚阿曉得？」朱藹人問：「為啥？」蔣月琴道：「故末也是上海灘浪一樁笑話：為仔黃翠鳳勿許俚來，俚勿敢來哉。倪從小來里堂子里做生意，倒勿曾聽見歇像羅老爺個客人。」朱藹人道：「阿有價事嗄？」蔣月琴道：「俚教湯老爺來開消，湯老爺搭倪說個唍。」朱藹人道：「耐哚阿曾去請俚？」蔣月琴道：「倪是隨便俚末哉，來也罷匆來也罷。倪搭說勿做末也做仔四五年哚，俚乃多花脾氣，倪也摸著點個哉。俚搭黃翠鳳來哚要好辰光，倪去請俚也請勿到，倒好像是搭俚打岔。倪索性勿去請！朱老爺耐看來哚，看俚做黃翠鳳阿做得到四五年。到個辰光，俚原要到倪搭來哉，也用勿著倪去請俚哉。」
朱藹人聽言察理，倒覺得蔣月琴很有意思，再要問他底細，只聽得檯面上連聲「請朱老爺」，朱藹人只得歸席。原來，黎篆鴻叫屠明珠打個通關，李實夫、李鶴汀、於老德三人都已打過，挨著朱藹人豁拳。
朱藹人豁過之後，屠明珠的通關已畢。當下會豁拳的倌人爭先出手，請教豁拳。這裡也要豁，那裡也要豁；一時袖舞釧鳴，燈搖花顫，聽不清是「五魁」、「八馬」，看不出是「對手」、「平拳」。鬧得黎篆鴻煩躁起來，因叫干稀飯：「倪要吃飯哉。」
倌人聽說吃飯，方才罷休，漸漸各散。惟屠明珠泅不猶人，直等到吃過飯始去。
李鶴汀要早些睡，一至席終，和李實夫告辭先走。匡二跟了，徑回石路長安客棧。到了房裡，李實夫自向床上點燈吸煙。
李鶴汀令匡二鋪床。實夫詫異，問道：「楊媛媛搭啥勿去哉嗄？」
鶴汀說：「勿去哉。」實夫道：「耐要勿為仔我來里，倒白相來勿舒齊。耐去末哉唍。」鶴汀道：「我昨日一夜天勿曾困，今朝要早點睏覺哉。」實夫嘿然半晌，慢慢說道：「夷場浪賭是賭勿得個喤。耐要賭末，轉去到鄉下去賭。」鶴汀道：「賭是也匆曾賭歇，就來哚堂子里碰仔幾場和。」實夫道：「碰和是勿好算賭；只要匆賭，要勿去闖出啥窮禍來。」鶴汀不便接說下去，竟自寬衣安睡。
實夫叫匡二把煙斗里煙灰出了。匡二一面低頭挖灰，一面笑問：「四老爺叫來哚個老倌人，名字叫啥？」實夫說：「叫屠明珠，耐看阿好？」匡二笑而不言。實夫道：「啥勿響嗄？
勿好末，也說末哉唍。」匡二道：「倪看仔無啥好。就不過黎大人末，倒撫牢仔當俚寶貝。四老爺，難下轉要勿去叫俚哉，落得讓撥來黎大人仔罷。」實夫聽說，不禁一笑。匡二也笑道：「四老爺，耐看俚阿好嗄？門前一路頭髮末才沓光個哉；嘴裡牙齒也剩勿多幾個；連面孔才咽仔進去哉。俚搭黎大人來哚說閑話，笑起來阿要難看！一隻嘴張開仔，面孔浪皮才牽仔攏去，好像鑲仔一埭水浪邊。倪倒搭俚有點難為情，也虧俚做得出多花神妖鬼怪！拿面鏡子來教俚自家去照照看，阿相像嗄！」實夫大笑道：「今朝屠明珠真真倒仔滿哉！耐勿曉得，俚名氣倒響得野哚，手裡也有兩萬洋錢，推扳點客人還來哚拍俚馬屁哉。」
匡二道：「要是倪做仔客人，就算是屠明珠倒貼末，老實說，勿高興！倒是黎大人吃酒個場花，阿是叫蔣月琴，倒還老實點。
粉也匆曾拍，著仔一件月白竹布衫，頭浪一點點勿插啥，年紀比仔屠明珠也差勿多哉喤。好是無啥好，不過清清爽爽，倒像是個娘姨。」實夫道：「也算耐眼睛光勿推扳。耐說俚像個娘姨，俚是衣裳頭面多得來多匆過哉。為此著末也匆著，戴末也匆戴。耐看俚帽子浪一粒包頭珠有幾花大？要五百塊洋錢哚！」
匡二道：「倒勿懂俚哚陸里來幾花洋錢？」實夫道：「才是客人去送撥俚哚個唍！就像今夜頭一歇歇工夫末，也百把洋錢哉。
黎大人是勿要緊，倪末叫冤枉煞哚，兩家頭難為廿幾塊。難下轉俚要請倪去吃花酒，我勿去，讓大少爺一干仔去末哉。」匡二道：「四老爺末再要說笑話哉。到仔埭上海白相相，該應用脫兩錢。要是無投末叫無法子。像四老爺，就年勢間里多下來用用末也用勿完唍。」實夫道：「勿是我做人家。要白相末陸里勿好白相，做啥長三書寓呢？阿是長三書寓名氣好聽點，真真是剷頭客人。」說得