按：當下上燈時候，王蓮生下樓上轎，抬至東合興里吳雪香家。來安通報。娘姨打起帘子，迎到房裡。只有朱藹人和葛仲英並坐閑談；王蓮生進去，彼此拱手就坐。蓮生叫來安來吩咐道：「耐到對過姚家去看看，樓浪房間里物事阿曾齊。」
來安去後，葛仲英因問道：「我今朝看見耐條子，我想，東合興無撥啥張蕙貞唍。後來相幫哚說，明朝有個張蕙貞調到對過來，阿是嗄？」朱藹人道：「張蕙貞名字也匆曾見過歇，耐到陸里去尋出來個嗄？」蓮生微笑道：「謝謝耐哚，晚歇沈小紅來，要勿說起，阿好？」朱藹人、葛仲英聽了皆大笑。
一時，來安回來稟說：「房間里才舒齊哚哉。四盞燈搭一隻榻床，說是匆多歇送得去，榻床末排好，燈末也掛起來哉。」
蓮生又吩咐道：「耐再到祥春里去告訴俚哚。」來安答應，退出客堂，交代兩個轎班道：「耐哚要勿走開。要走末，等我轉來仔了去。」說畢出門，行至東合興里弄口，黑暗裡閃過一個人影子，挽住來安臂膊。來安看是朱藹人的管家，名叫張壽，乃嗔道：「做啥嗄，嚇我價一跳！」張壽問：「到陸里去？」
來安攙著他說：「搭耐一淘去白相歇。」
於是兩人勾肩搭背，同至祥春里張蕙貞家，向老娘姨說了，叫他傳話上去。張蕙貞又開出樓窗來，問來安道：「王老爺阿來嗄？」來安道：「老爺來哚吃酒，勿見得來哉喤。」蕙貞道：「吃酒叫啥人？」來安道：「勿曉得。」蕙貞道：「阿是叫沈小紅？」來安道：「也勿曉得唍。」蕙貞笑道：「耐末算幫耐哚老爺，勿叫沈小紅叫啥人嗄？」來安更不答話，同張壽出了樣春里，商量「到陸里去白相」。張壽道：「就不過蘭芳里哉喤。」來安說：「忒遠。」張壽道：「勿是末潘三搭去，看看徐茂榮阿來哚。」來安道：「好。」
兩人轉至居安里，摸到潘三家門首，先在門縫裡張一張，舉手推時，卻是拴著的。張壽敲了兩下，不見答應。又連敲了幾下，方有娘姨在內問道：「啥人來哚碰門嗄？」來安接嘴道：「是我。」娘姨道：「小姐出去哉，對勿住。」來安道：「耐開門喤。』等了好一會，裡面靜悄悄的不見開門。張壽性起，拐起腳來把門「彭彭彭」踢的怪響，嘴裡便罵起來。娘姨才慌道：「來哉，來哉！」開門見了，道：「張大爺、來大爺來哉，我道是啥人。」來安問：「徐大爺阿來里？」娘姨道：「勿曾來唍。」張壽見廂房內有些火光，三腳兩步，直闖到房間里，來安也跟進去。只見一人從大床帳子里鑽出來，拍手跺腳的大笑。看時，正是徐茂榮。張壽、來安齊說道：「倪倒來驚動仔耐哉唍，阿要對勿住嗄！」娘姨在後面也呵呵笑道：「我只道徐大爺去個哉，倒來哚床浪。」
徐茂榮點了榻床煙燈，叫張壽吸煙。張壽叫來安去吸，自己卻撩開大床帳子，直爬上去。只聽得床上扭做一團，又大聲喊道：「啥嗄，吵勿清爽！」娘姨忙上前勸道：「張大爺，要勿喤」張壽不肯放手，徐茂榮過去一把拉起張壽來，道：「耐末一泡子吵去看光景，阿有點清頭嗄！」張壽抹臉羞他道：「耐算幫耐哚相好哉，阿是耐個相好嗄？哪，面孔！」
那野雞潘三披著棉襖下床。張壽還笑嘻嘻胰著他做景緻。
潘三沉下臉來，白瞪著眼，直直的看了張壽半日。張壽把頭頸一縮，道：「阿唷，阿唷！我嚇得來！」潘三沒奈何，只掙出一句道：「倪要板面孔個！」張壽隨口答道：「要勿說啥面孔哉！耐就板起屁股來，倪」說到「倪」字，卻頓住嘴，重又上前去潘三耳朵邊說了兩句。潘三發極道：「徐大爺耐聽喤，耐哚好朋友說個啥閑話嗄！」徐茂榮向張壽央告道：「種種是倪勿好，叨光耐搭倪包荒點，好阿哥！」張壽道：「耐叫饒仔也罷哉，勿然我要問聲俚看，大家是朋友，阿是徐大爺比仔張大爺長三寸哚？」潘三接嘴道：「耐張大爺有恩相好來哚，倪是巴結匆上唍，只好徐大爺來照應點倪唍。」張壽向來安道：「耐聽喤，徐大爺叫得阿要開心！徐大爺個魂靈也撥俚叫仔去哉。」來安道：「倪要勿聽，阿有啥人來叫聲倪嗄。」
潘三笑道：「來大爺末算得是好朋友哉，說說閑話也要幫句把哚。」張壽道：「耐要是說起朋友來」剛說得一句，被徐茂榮大喝一聲，剪住了道：「耐再要說出啥來末，兩記耳光！」
張壽道：「就算我怕仔耐末哉，阿好？」徐茂榮道：「耐倒來討我個便宜哉！」一面說，一面挽起袖子，趕去要打。張壽慌忙奔出天井，徐茂榮也趕出去。
張壽拔去門閂，直奔到弄東轉彎處，不料黑暗中有人走來，劈頭一撞。那人說：「做啥，做啥？」聲音很覺廝熟。徐茂榮上前問道：「阿是長哥嗄？」那人答應了。徐茂榮遂拉了那人的手，轉身回去；又招呼張壽道：「進來罷，饒仔耐罷。」
張壽放輕腳步，隨後進門，仍把門閂上，先向簾下去張看那人，原來是陳小雲的管家，名叫長福。張壽忙進去問他：「阿是散仔檯面哉？」長福道：「陸里就散？局票坎坎發下去。」
張壽想了想，叫：「來哥，優先去罷。」徐茂榮道：「倪一淘去哉。」說著，即一哄而去，潘三送也送不及。
四人同高了居安里，往東至石路口。張壽不知就裡，只望前走。徐茂榮一把拉住，叫他朝南。張壽向來安道：「倪勿去哉喤。」徐茂榮從背後一推，說道：「耐勿去？耐強強看！」
張壽幾乎打跌，只得一同過了鄭家木橋。
走到新街中，只見街傍一個娘姨，搶過來叫聲「長大爺」，拉了長福袖子，口裡說著話，腳下仍走著路，引到一處，推開一扇半截門闌進去。裡面只有個六七十歲的老婆子，靠壁而坐。
桌子上放著一盞暗昏昏的油燈。娘姨趕著叫郭孝婆，問：「煙盤來哚陸里？」郭孝婆道：「原來里床浪唍。」
娘姨忙取個紙吹，到後半間去，向壁間點著了馬口鐵回光鏡玻璃罩壁燈，集得高高的，請四人房裡來坐，又去點起煙燈來。長福道：「鴉片煙倪要勿吃，耐去叫王阿二來。」娘姨答應去了。那郭孝婆也顛頭簸腦，摸索到房裡，手裡拿著根洋鋼水煙筒，說：「陸里一位用煙？」長福一手接來，說聲「要勿客氣』。郭孝婆仍到外半間自坐著去。張壽問道：「該搭是啥個場花嗄？耐哚倒也會白相哚！」長福道：「耐說像啥場花？」
張壽道：「我看起來叫『三勿像』：野雞勿像野雞，台基勿像台基，花煙問勿像花煙問。」長福道：「原是花煙間。為仔俚有客人來哚，借該搭場花來坐歇，阿懂哉？」
說著，聽得那門闌「呀」的一聲響，長福忙望外看時，正是王阿二。進房即叫聲「長大爺」，又問三位尊姓，隨說：「對勿住，剛剛勿恰好。耐哚要是勿嫌齷齪末，就該搭坐歇吃筒煙，阿好？」長福看看徐茂榮，候他意思。徐茂榮見那王阿二倒是花煙間內出類拔革的人物，就此坐坐倒也無啥，即點了點頭。王阿二自去外間，拿進一根煙槍與兩盒子鴉片煙，又叫郭孝婆去喊娘姨來沖茶。張壽見那後半間只排著一張大床，連桌子都擺不下，局促極了，便又叫：「來哥，倪先去罷。」徐茂榮看光景也不好再留。
於是張壽作別，自和來安一路同回，仍至東合興里吳雪香家。那時檯面已散，問：「朱老爺、王老爺陸里去哉？」都說「勿曉得」。張壽趕著尋去。來安也尋到西薈芳里沈小紅家來，見轎子停在門口，忙走進客堂，問轎班道：「台商散仔啥辰光哉？」轎班道：「勿多一歇。」來安方放下心。
適值娘姨阿珠提著水銚子上樓，來安上前央告道：「謝謝耐，搭倪老爺說一聲。」阿珠不答，卻招手兒叫他上去。來安捏手捏腳，跟他到樓上當中間坐下，阿珠自進房去。來安等了個不耐煩，側耳聽聽，毫無聲息，卻又不敢下去。正要磕睡上來，忽聽得王蓮生咳嗽聲，接著腳步聲。又一會兒，阿珠掀開帘子招手兒。來安隨即進房，只見王蓮生獨坐在煙榻上打呵欠，一語不發。阿珠忙著絞手巾。蓮生接來揩了一把，方吩咐來安打轎回去。來安應了下樓，喊轎班點燈籠，等蓮生下來上了轎，一徑跟著回到五馬路公館。來安才回說：「張蕙貞搭去說過哉。」蓮生點頭無語。來安伺候安寢。
十五日是好日子，蓮生十點半鐘已自起身，洗臉漱口，用過點心便坐轎子去回拜葛仲英。來安跟了，至後馬路永安里德大匯劃庄，投進帖子，有二爺出來擋駕，說：「出門哉。」
蓮生乃命轉轎到東合興里，在轎中望見「張蕙貞寓」四個字，泥金黑漆，高揭門媚。及下轎進門，見天井裡一班小堂名，搭著一座小小唱台，金碧丹青，五光十色。一個新用的外場看見，搶過來叫聲「王老爺」，打了個千。一個新用的娘姨，立在樓梯上，請王老爺上樓。
張蕙貞也迎出房來，打扮得渾身上下，簇然一新，蓮生看著比先時更自不同。蕙貞見蓮生不轉睛的看，倒不好意思的，忙忍住笑，拉了蓮生袖子，推進房去。房間里齊齊整整，鋪設停當。蓮生滿心歡喜，但覺幾幅單條字畫還是市買的，不甚雅相。蕙貞把手帕子掩著嘴，取瓜子碟