按：湯嘯庵拉羅子富坐下，說道：「耐啥要緊喤？我說末，耐先教月琴先生打發個娘婉轉去，擺起檯面來。善卿坎坎來，也讓俚擺個庄，等藹人轉來仔一淘過去，俚哚也舒齊哉，阿是嗄？耐第歇去也不過等來哚，做啥呢？」羅子富連說「勿差」。
子富叫的兩個倌人，一個是老相好蔣月琴，便令娘姨轉去：「看俚哚檯面擺好仔末再來。」
洪善卿四面一看，果然不見朱藹人，只有林素芬和湯嘯庵應酬檯面。還有素芬的妹子林翠芬，是湯嘯庵叫的本堂局，也幫著張羅。洪善卿詫異，問道：「藹人是主人唍，陸里去哉喤？」
湯嘯庵道：「黎篆鴻說句閑話，教俚去一埭，要轉來快哉。」
洪善卿道：「說起黎篆鴻，倒想著哉。」即向陳小雲道：「荔甫要問耐，一篇帳阿曾拿到黎篆鴻搭去？」陳小雲道：「我托藹人拿得去哉。我看價錢開得忒大仔點。」洪善卿道：「阿曉得第號物事陸里來個嗄？」陳小雲道：「說是廣東人家，細底也勿清爽。」羅子富向洪善卿道：「我也要問耐，耐阿是做仔包打聽哉？雙珠先生有個廣東客人，勿曉得俚細底，耐阿曾搭俚打聽歇？」大家呵呵一笑。洪善卿也笑了。周雙珠道：「倪陸里有啥廣東客人嗄，耐倒搭倪拉個廣東客人來做做哉唍。」
羅子富正要回言，洪善卿攔住道：「要勿瞎說哉。我擺十杯庄，耐來打。」羅子富挽起袖子，與洪善卿豁拳，一交手便輸了。羅子富道：「豁仔一淘吃。」接連豁了五拳，竟輸了五拳。蔣月琴代了一杯。那一個新做的倌人叫黃翠鳳，也伸手來接酒。洪善卿道：「怪勿得耐要豁拳，有幾花人搭耐代酒哚。」
羅子富道：「大家勿許代，我自家吃。」洪善卿拍手的笑。陳小雲說：「代代罷。」湯嘯庵幫他篩酒，取一杯授與黃翠鳳吃。
黃翠鳳知道羅子富要翻台到蔣月琴家去，因說道：「倪去哉，阿要存兩杯？」羅子富搖頭說：「要勿存哉。」黃翠鳳乃先走了。
湯嘯庵勸羅子富停歇再豁，卻教陳小雲先與洪善卿交手，也豁上五拳。接著湯嘯庵自己都豁過了，單剩下葛仲英一個。
那葛仲英正或轉身，和倌人吳雪香兩個唧唧噥噥的咬耳朵說話，連半日洪善卿如何擺庄都沒有理會。及至湯嘯庵叫他豁拳，葛仲英方回頭問：「做啥？」羅子富道：「曉得耐哚是恩相好，檯面浪也推扳點末哉。阿是要做出來撥倪看看？」吳雪香把手帕子望羅子富面上甩來，說道：「耐末總無撥一句好閑話說出來！」
洪善卿拱手向葛仲英道：「請教豁拳。」葛仲英只豁得兩拳，吃過酒，仍和吳雪香去說話。羅子富已耐不得，伸拳與洪善卿重又豁起，這番卻是贏的。洪善卿十杯庄消去九杯，羅子富想打完這庄，偏不巧又輸了。忽聽得樓下外場喊說「朱老爺上來」。陳小雲忙阻止羅子富道：「讓藹人來豁仔一拳，收令罷。」羅子富聽說有理，便不再豁。朱藹人匆匆歸席，連說：「失陪，得罪。」又問：「啥人來里擺庄？」
洪善卿且不豁拳，卻反問朱藹人道：「耐有啥要緊事體搭我商量？」朱藹人茫然不知，說：「我無啥事體唍。」羅子富不禁笑道：「請耐吃花酒，倒勿是要緊事體？」洪善卿也笑道：「我就曉得是耐來哚捏忙。」羅子富道：「就算是我捏忙，快點豁仔拳了去。」朱藹人道：「只剩仔一拳，也要勿豁哉。我來每位敬一杯。」大家說：「遵命。」
朱藹人取齊六隻雞缸杯，都篩上酒，一齊干訖，離席散坐。
外場七手八腳絞了手巾，那蔣月琴的娘姨早來回話過了，當下又上前催請一遍。葛仲英、羅子富、朱藹人各有轎子，陳小雲自坐包車，一起倌人隨著客轎，帶局過去。惟湯嘯庵與洪善卿步行，乃約同了先走一步。
二人離了林素芬家，來到尚仁里弄口，有一人正要進弄，見了忙側身垂手，叫聲「洪老爺」。洪善卿認得是王蓮生的管家，名叫來安的，便問他：「老爺呢？」來安道：「倪老爺來吸祥春里，請洪老爺過去說句閑話。」洪善卿道：「祥春里啥人家嗄？」來安道：「叫張蕙貞。倪老爺也坎坎做起，有勿多兩日。」洪善卿聽了，即轉向湯嘯庵說：「我去一埭就來。蔣月琴搭請俚哚先坐罷。」湯嘯庵叮囑快點，自去了。
洪善卿隨著來安，徑至祥春里，弄內黑魆魆的，摸過二三家，推開兩扇大門進去。來安喊說：「洪老爺來里！」樓上接應了，不見動靜。來安又說：「拿鐵四光壁燈，迎下樓來，說：「請洪老爺樓浪去喤。」
善卿見樓下客堂里七橫八豎的堆著許多紅木桌椅，像要搬場光景。上樓看時，當中掛一盞保險燈，映著四壁，像月洞一般，卻空落落的沒有一些東西，只剩下一張跋步床，一隻梳妝台，連簾帳、燈鏡諸件都收拾乾淨了。王蓮生坐在梳妝台前，正擺著四個小碗吃便夜飯。旁邊一個倌人陪他同吃，想來便是張蕙貞。
善卿到了房裡，即笑說道：「耐倒一干仔來里尋開心。」
蓮生起身招呼，覺善卿臉上有酒意，問：「阿是來哚吃酒？」
善卿道：「吃仔兩台哉。俚哚請仔耐好幾埭哚，故歇羅子富翻到仔蔣月琴搭去哉，耐阿高興一淘去？」蓮生微笑搖頭。善卿隨意向床上坐下，張蕙貞親自送過一支水煙筒來。善卿接了，忙說：「要勿客氣，耐請用飯喤。」蕙貞笑道：「倪吃好哉呀。」
善卿見張蕙貞滿面和氣，藹然可親，約摸是么二住家，問他：「阿是要調頭？」蕙貞點頭應「是」。善卿道：「調來哚陸里？」蕙貞說：「是東合興里大腳姚家，來哚吳雪香哚對門。」善卿道：「包房間呢？做夥計？」蕙貞道：「倪是包房間，三十塊洋錢一月哚。」善卿道：「有限得勢。單是王老爺一干仔末，一節做下來也差勿多五六百局錢哚，阿怕啥開消匆出？」說著，王蓮生已吃畢飯，揩面漱口。那老娘姨端了一副鴉片煙盤，問蕙貞：「擺陸里嗄？」蕙貞道：「生來擺來哚床浪哉唍，阿要擺到地浪去？」老娘姨唏唏呵呵的端到床上，說道：「撥來洪老爺看仔，阿要笑煞嗄。」蕙貞道：「耐收捉仔下頭去罷，要勿多說多話哉。」那老娘姨方搬了碗碟杯筷下樓。
蕙貞乃請蓮生吃煙。蓮生去床上與善卿對面躺下，然後說道：「我請耐來，要買兩樣物事：一隻大理石紅木榻床，一堂湘妃竹翎毛燈片。耐明朝就搭我買得來最好。」善卿道：「送到陸里嗄？」蓮生道：「就送到大腳姚家去，來哚樓浪西面房間里。」
善卿聽說，看看蕙貞，嘻嘻的笑道：「耐教別人去搭耐買仔罷，我匆來買。撥來沈小紅曉得仔，吃俚兩記耳光哉喤！」
蓮生笑而不言。蕙貞道：「洪老爺，耐啥見仔沈小紅也怕個嗄？」
善卿道：「啥勿怕！耐問聲王老爺看，凶得來！」蕙貞道：「洪老爺，謝謝耐，看王老爺面浪照應點倪。」善卿道：「耐拿啥物事來謝我喤？」蕙貞道：「請耐吃酒阿好？」善卿道：「啥人要吃耐台把啥酒嗄！阿是我勿曾吃歇，稀奇煞仔？」
蕙貞道：「價末謝耐啥喤？」善卿道：「耐要請我吃酒末，倒是請我吃點心罷。耐末也便得勢，要勿去難為啥洋錢哉，阿是？」蕙貞嗤的笑道：「耐哚才勿是好人。」善卿呵呵一笑，站起來道：「還有啥閑話未說，倪要去哉。」蓮生道：「無啥哉，後日請耐吃酒。耐看見子富哚，先搭我說一聲，明朝送條子去。「善卿一面答應，一面下樓，仍至四馬路東公和里蔣月琴家吃酒去了。
蕙貞見善卿已去，才上床來歪在蓮生身上，給他燒煙。蓮生接連吸了七八口，漸漸合攏眼睛，似乎睡去。蕙貞低聲叫道：「王老爺安置罷。」蓮生點點頭。於是端過煙盤，收拾共睡。
次日一點鐘辰光，兩人始起身洗臉。老娘姨搬上稀飯來吃了些，蕙貞就在梳裝台前梳頭。老娘姨仍把煙盤擺在床上。蓮生自去吸起煙來，心想沈小紅家須得先去撒個謊，然後再慢慢的告訴他才好。盤算一回，打定主意，便取馬褂著了要走。蕙貞忙問：「陸里去？」蓮生道：「我到沈小紅搭去一埭。」蕙貞道：「價末吃仔飯了去喤。」蓮生道：「要勿吃哉。」蕙貞又問：「晚歇阿來吸？」蓮生想了想，說道：「耐明朝啥辰光到東合興去？」蕙貞道：「倪一早就過去哉。」蓮生道：「我明朝一點鐘到東合興來。」蕙貞道：「耐有工夫末晚歇來一埭。」
蓮生應諾，踅下樓來；來安跟了，出祥春里，向東至西薈芳里弄口，令來安回公館去打轎子來，自己即轉彎進弄。娘姨阿珠先已望見，喊道：「阿唷，王老爺來哉！」趕忙迎出天井裡，一把拉住袖子；進去又喊道：「先生，王老爺來哉。」拉到樓梯邊，方放了手。
蓮生款步上樓。沈小紅也出房相迎，似笑不笑的說道：「王老爺，耐倒好意思」說得半句，哽噎住了。蓮生見他一副凄涼麵孔，著實有些不過意，嘻著嘴進房坐下。沈小紅也跟進來，挨在身傍，挽著蓮生的手，問道：「我要問耐，耐三日天來哚陸里？」蓮生道：「我來里城裡，為仔個朋友做生日，去吃仔三日天酒。」小紅冷笑道：「耐只好去騙騙小干仵！」