從劉三姐的山歌想到招子庸所作的《粵謳》，鄭振鐸在《中國俗文學史》中評為：「妙語如珠，即不懂粵語者讀之，也為之神移！」他認為招子庸是堪稱「把民歌輸入文壇的工作者」的。可見其評價之高。今錄招子庸的代表作《吊秋喜》一篇如下：
聽見你話死，實在見思疑。何苦輕生得咁痴！你係為人客死唔怪得你，死因錢債，叫我怎不傷悲！你平日當我系知心亦該同我講句，做乜交情三兩個月都冇句言辭，往日個種恩情丟了落水，縱有金銀燒盡帶不到陰司。可惜飄泊在青樓辜負你一世，種花場上冇日開眉。
你名叫秋喜，只望等到秋來還有喜意，做乜才過冬至就被雪霜欺？今日無力春風唔共你爭得啖氣，落花無主咁就葬在春泥！此後情思有夢你便頻須寄，或者盡我呢點窮心慰嚇故知。泉路茫茫你雙腳又咁細，黃泉無客店問你向乜誰棲？青山白骨唔知憑誰祭，衰楊殘月空聽個只杜鵑啼？未必有個知心來共你燒紙，清明空恨個頁紙錢飛。
罷咯，不若當做你系義妻來送你入寺，等你孤魂無主仗嚇佛力扶持，你便哀懇個位慈雲施嚇佛偈，等你轉過來生，誓不做客妻。若系冤債未償再罰你落花粉地，你便揀過一個多情早早見機。我若與你未斷情緣重有相會日子，須緊記，念嚇前恩義。講到「銷魂」兩個字，共你死過都唔遲！
鄭振鐸對這首粵謳評價很高，認為它「是一篇凄楚的抒情」作品，「像《吊秋喜》這樣溫厚多情的情詩，在從前很少見到」。
據說秋喜實有其人，是個有點名氣的妓女，招子庸曾和她相好。其後秋喜因錢債自殺，招因此作這首粵謳吊她。